Был турала Ирандың милли геопарктар селтәре рәйесе Алиреза Амриказеми бөгөн Өфө фән һәм технологиялар университетында үткән осрашыуҙа белдерҙе. Мәғлүм булыуынса, 2020 йылда Салауат районындағы «Янғантау» геопаркы Рәсәйҙә тәүгеләрҙән булып ЮНЕСКО-ның глобаль геопарктар селтәренә инде. Әле ошо уҡ статусты «Торатау» ға биреү буйынса эш алып барыла, геопарк 3 йыл элек дәғүәселәр исемлегенә индерелгән дә инде.
Халыҡ-ара геология фәндәре союзының экспертиза йомғаҡтары буйынса Башҡортостандың ғаризаһын геомираҫты тасуирлау буйынса иң яҡшыһы тип билдәләнгән. Хәҙер глобаль селтәргә инеү өсөн халыҡ-ара эксперттарҙың һығымтаһы, документтар базаһы туплау мотлаҡ. Ирандың милли геопарктар селтәре рәйесе Алиреза Амриказеми Торатауҙа 4 көн булған. Донъяуи кимәлдәге эксперт фекеренсә, Башҡортостандың 2 генә түгел, 3-4 геопарк асырлыҡ тәбиғи ҡомартҡылары бар. Осрашыуҙа фәнни өлкәлә хеҙмәттәшлек мөмкинлектәре ҡаралды, ике яҡ араһындағы килешеүгә ҡул ҡуйылды.
