Ауыр тән йәрәхәттәре алған пациенттарҙы үлемдән аралау маҡсатында һауаға күтәрелеү санавиация табиптары һәм осоусылары өсөн һөнәри бурыс. Белгестәр төпкөлдәрҙән һәм юл ҡатмарлы булған райондарҙан башҡала дауаханаларына ашығыс рәүештә пациенттарҙы «ҡанатлы медицина» ярҙамында алып килә. Республикалы был үтә лә яуаплы һәм яйға һалынған хеҙмәт. Башҡортостан табиптары тәүге осошто 4 йыл элек башҡарған. Ул саҡта республика Хөкүмәте һәм һаулыҡ һаҡлау министрлығы ярҙамында субсидия бүленә, санавиация вертолеты һатып алынды һәм пациенттарҙы ҡотҡарыу осоштары башланды. Был хаҡта киләһе яҙмала.
Диспетчер шылтыратыуына улар тулы әҙерлек һыҙығында тора. Кеше ғүмере хәүеф аҫтында булғанда, үлем менән йәшәү өсөн көрәшеүсе пациент янына санавиация ашыға. Бурыс: пациентты дауаханаға тиҙ арала , ә иң мөһиме - тере килеш килтереп еткереү.
Был юлы Ҡыуатов исемендәге Республика клиник дауаханаһы табиптары бригадаһы ашығыс рәүештә Илеш районына юлланды. Унда уларҙы тәнен бешкән пациент көтә.
Вертолет пациентты тиҙ арала һауа юлы менән Өфөгә алып килә. Каталкала көнкүрештә йәрәхәттәр алған ҡатын. Уны артабан Республика тән бешеүен дауалау үҙәгенә алып барыу өсөн ашығыс ярҙам каретаһы көтә. Быйыл «ҡанатлы» медицина ярҙамы менән 95 осош үтәлгән.
Санавиация табиптарға «алтын сәғәт ҡағиҙәһе»н үтәргә ярҙам итә. Был ваҡытта кеше йәрәхәтләнгәндән йәки хәле насарайғандан һуң йәшәү өсөн әүҙем көрәшә. Тәүге 60 минут эсендә күрһәтелгән ярҙам пациентты ҡотҡарыу мөмкинлеген арттыра. Шуға күрә санитар рейстың аэропорттан тиҙ арала һауаға күтәрелеүе бик мөһим.
Бортта үпкәләрҙе яһалма елләтеү өсөн ҡорамалдар, дефибрилятор урынлашҡан. Асылда, был осоусы реанимация. Сөнки табиптарға пацентҡа осош мәлендә дә ярҙам күрһәтергә тура килә. Шуға күрә вертолет һәр ваҡыт һауаға күтәрелергә әҙер, тулыһынса төҙөк , ә бөтә медицина ҡорамалдары ғүмерҙәрҙе ҡотҡарыу өсөн көйләнгән булырға тейеш.
Һәр осош мөһим. Әммә һәр табип һәм осоусының тетрәндергес һәм иҫтә ҡалырлыҡ үҙ хәтирәһе бар.
Улар өсөн кеше ғүмерҙәрен ҡотҡарыу- һөнәри яуаплылыҡ. Һәр бер хәл-осраҡтың сәғәт- минуттар менән һаналыуы- санитар авиация хеҙмәткәрҙәре өсөн көндәлек көсәргәнешле хеҙмәт һәм йәшәү рәүеше. Һуңғы 4 йылда һауа фәрештәләре 500-ҙән ашыу осош яһаған. Тимәк, улар ярҙамы менән Башҡортостанда ярты мең пациент һауыҡҡан һәм ғүмерен оҙайтҡан.
Гүзәл Борханова
