Радий Хәбиров хөкүмәттә уҙған оператив кәңәшмәлә район хакимиәте башлыҡтарына иң проблемалы юл өлөштәрен билдәләү кәрәклеге тураһында белдерҙе. Ул Транспорт һәм юл хужалығы министрлығы етәксеһе Любовь Минаковаға муниципалитет башлыҡтарынан 2025-2027 йылдарҙа башҡарыласаҡ эштәрҙе асыҡларға ҡушты. “Һәр урында проблемалы юлдар бар. Кешеләргә барыһын да яҡшылап аңлатырға кәрәк. Уларҙы алдарға ярамай. Вәғәҙәләр үтәлергә тейеш”, - тине республика етәксеһе.
2023 йылда Радий Хәбировтың башланғысы менән үтә насар юлдар программаһы булдырылды. Халыҡ төҙөкләндереүҙе һораған юл участкалары исемлеккә индерелә. Быйыл программаны тормошҡа ашырыуға 5 миллиард һумға яҡын аҡса бүленгән.
