Башҡортостанда «Сәләмәт республика - сәләмәт төбәк» акцияһы дауам итә. Был юлы Сәләмәтлек поездары Шаран районы Йәнәхмәт ауылына туҡталды. Пациенттар бер урында анализдар тапшырып, УЗИ, ЭКГ, флюрография үтте. Акцияның төп маҡсаты - сирҙәрҙе ваҡытында билдәләп, пациентҡа юғары сифатлы медицина ярҙамы күрһәтеү. Уның ярҙамында ауыл халҡы белгестәргә туранан-тура мөрәжәғәт итә ала. Поездарҙың төпкөл ауылдарға килеүе бигерәк тә пенсия йәшендәгеләр һәм һаулыҡ мөмкинлектәре сикләнгән пациенттар өсөн уңайлы.
Йәнәхмәт ауылында ике көндә күсмә медицина пунктына 60-тан ашыу пациент мөрәжәғәт иткән. Сәләмәтлек поездары райондың 3 ауылына туҡталасаҡ. Сентябрҙә күсмә дауахана Бөрө, Дәүләкән, Дыуан, Ейәнсура, Салауат, Өфө, Хәйбулла райондарына юлланыр, тип көтөлә. Медицина тикшереүе бушлай үткәрелә. Пациенттарға үҙе менән паспорт һәм ОМС полисын алыу талап ителә.
