Өфөлә «Ҡаршылыҡтарҙы еңеп» форумында мөмкинлектәре сикләнгән граждандар өсөн махсус экскурсия ойошторолдо. Насар күргән, хәрәкәт итеү ҡатмарлыҡтары кисергән ҡатын-ҡыҙҙар һәм ир-егеттәр радиомикрофон аша мәғлүмәт тыңлап, баш ҡаланың иҫтәлекле урындары менән танышты. Ике сәғәткә иҫәпләнгән сәйәхәт барышында улар Өфөнөң тарихы, арҙаҡлы шәхестәре , хеҙмәт ҡаһарманлығы исемен йөрөткән ҡаланың ҡаҙаныштары тураһында мәғлүмәт тупланы. Мөмкинлектәре сикләнгән граждандарҙың тәьҫораттарына таянып экскурсияны даими ойоштороу ҡаралған.
«Ҡаршылыҡтарҙы еңеп» өсөнсө Бөтә Рәсәй форум-күргәҙмәһенең икенсе көнөндә төрлө конкурстарҙа еңеүсе уҡыусылар бүләкләнде. Көн дауамында дискуссия майҙансыҡтары, түңәрәк өҫтәлдәр эшләп торҙо. Инвалидтарға уңайлы мөхит булдырыу, уларҙың йәшәү сифатын яҡшыртыу буйынса мөһим ҡарарҙар ҡабул ителде.
