Уның сиктәрендә табиптар ишетеү һәләте насар булған пациенттар менән ым-ишара теле аша һөйләшергә өйрәнә. Проектҡа тәүгеләрҙән булып ҡушылған медицина хеҙмәткәрҙәре менән БЮТ хәбәрсеһе Гөлназ Хәйбуллина аралашты.
Кариесты ваҡытында дауаларға кәрәк. Теш табибының ым-ишара телен аңлап, мөмкинлектәре сикләнгән пациент менән иркен аралашыуы - дауалау курсын дөрөҫ билдәләргә ярҙам итә.
Өфөнөң 1-cе стоматология поликлиникаһында ике йәш белгес ым-ишара теле буйынса махсус уҡыуҙар үткән. Индира Хәбирова билдәләүенсә, ишетеү һәләте буйынса инвалидтар менән эшләүе еңел. Иң мөһиме - улар хәҙер бер ниндәй ҡурҡыу тойғоһоҙ дауаланырға килә. Сөнки бында сурдотәржемәсеһеҙ ҙә аңлап ҡабул итәләр, төрлө һорауҙарға яуап алырға мөмкин.
«Мин ишетәм һеҙҙе, доктор» проекты ишетеү һәләте буйынса 3-сө төркөм инвалиды Зилә Басирова башланғысы менән тормошҡа ашырыла. Һаулыҡ мөмкинлектәре сикләнгән пациенттарға ни тиклем дауаханаға эләгеүе ауыр булыуын ул үҙ миҫалында яҡшы белә. 2018 йылда киҫкен мәсьәләне хәл итеү маҡсатында медицина хеҙмәткәрҙәре менән әүҙемерәк эшләргә, уларҙы ым-ишара теленә өйрәтергә ҡарар итә. Әлегә проектҡа алты табип ҡушылған.
Зилә Басирова ишетеү һәләте буйынса инвалидтарҙың тормошон яҡшыртыу, уларҙы йәмғиәткә яраҡлаштырыу йүнәлешендә тағы ла бер проект алып бара. Автомобиль йөрөтөү буйынса инструкторҙарҙы ла ым-ишара теленә өйрәтә. Һуңғылары үҙ сиратында мөмкинлектәре сикләнгән кешеләр менән эште көсәйткән
Гөлназ Хәйбуллина
