Проблема ауылда ғына түгел, бөтә ауыл биләмәһендә күҙәтелә. Урындағыларға мәктәп, балалар баҡсаһы, дауахана кеүек социаль учреждениеларға ла барып етеүе ҡатмарлы. Халыҡ яуаплы ведомстволарға ла мөрәжәғәт итә, тик үҙгәреш юҡ. Урындағылар менән БЮТ ижади төркөмө аралашты.
Ауылда автобустар етмәүе - йоматауҙарҙың күптәнге баш бәләһе. Мәсьәлә буйынса ниндәй генә ведомство тупһаһы тапалмаған. Ауылда автобустар бөтөнләй юҡ түгел, бар. Тик улар шәхси эшҡыуарҙыҡы, шуға, әйтәйек, «Алға» картаһы кеүек льготалар менән файҙаланып булмай. Бынан тыш, иҫке автобустарҙа ел үтә, ә түбәһенән һыу аға.
2022 йылда ауыл советында транспорт мәсьәләһе аҙ ғына булһа ла яҡшыра. Маршрутҡа яңы автобустар өҫтәлә. Тик бәхет оҙаҡ дауам итмәй, былтыр улар йөрөүҙән туҡтай. Халыҡ һәр саҡ шығырым тулы 114-се автобуста йөрөүен дауам итә.
Мәсьәлә буйынса Пассажирҙар ташыуҙы ойоштороу үҙәгенә мөрәжәғәт иттек. Ойошмананан белдереүҙәренсә, автобустар һаны кәмеүе яңыраҡ теркәлгән юл-транспорт ваҡиғаһына бәйле.
Урындағы халыҡ белдереүенсә, ауылға 3 түгел, кәмендә 5 автобус йөрөргә тейеш. Проблема бер нисә тиҫтә йыл дауам итә. Йоматау ауыл биләмәһе халҡы бирешмәй, мәсьәлә тиҙ арала хәл ителер, тип өмөтләнә.
Рәзилә Ғилметдинова
