Был турала Рәсәй генераль прокуроры урынбаҫары Николай Шишкин ҡатнашлығында үткән коллегия ултырышында иғлан ителде. Башҡортостан башлығы Радий Хәбиров ведомство хеҙмәткәрҙәренә төбәктә башҡарылған күләмле эш өсөн рәхмәтен еткерҙе. Прокуратура хеҙмәткәрҙәре былтыр 368 миллион һум күләмендә граждандарға эш хаҡы буйынса түләнергә тейешле бурысты асыҡлаған.
Ведомство ярҙамында мөмкинлектәре сикләнгән балалар йәшәү өсөн кәрәкле дарыуҙар менән тәьмин ителгән, 750 балаға алимент аҡсаларын түләү ойошторолған. Махсус хәрби операцияла ҡатнашыусы яугирҙарҙың хоҡуҡтарын яҡлау йүнәлешендә лә ҙур эш башҡарылған. 39 яугирҙың торлаҡ-коммуналь хужалыҡ буйынса йыйылған бурысы ыңғай хәл ителгән. Прокуратура хеҙмәткәрҙәре яуаплығы менән төҙөлөш тармағында 350 млн һумға баһаланған урлашыу кисектерелгән. Социаль объекттар файҙаланыуға ваҡытында тапшырылған.
