Урында йәшәүселәр ялыуҙар менән яуаплы ведомстволарға мөрәжәғәт иткән. Хәл буйынса тикшереүҙәр ойошторолған, Роспотребнадзор идаралығы район хакимиәтенә кимереүселәрҙе юҡ итеү буйынса саралар ойоштороу тураһында күрһәтмә сығарған. Бөгөн урындағы хәлде тикшерер өсөн республиканың Торлаҡ һәм төҙөлөш күҙәтеүе дәүләт комитеты хеҙмәткәрҙәре лә рейдҡа сыҡты. Килеп тыуған: хәл сәбәптәрен БЮТ ижади төркөмө асыҡланы.
Бер-ике генә лә түгел, бер урында тиҫтәләгән сысҡан. «Сосны» тораҡ комплексы халҡы өсөн кимереүселәр йорт хайуанына әйләнгән тиһәң дә була. Инде уларҙан хатта кескәйҙәр ҙа ҡурҡмай. Шулай ҙа ауырыуҙар йоҡторған сысҡандар шөрләтә, ата-әсәләр генә түгел, бесәй йәки эт хужалары ла хәүефләнә.
Белгестәр белдереүенсә, йорттарҙа баҫыу сысҡандары оялаған. Күрәһең, көндәр йылы торғанға, уларҙың өңдәрен һыу баҫҡан һәм улар комплексҡа сыҡҡан. Хәйер, ошо көндәрҙә һауа температураһы ҡырҡа үҙгәреү менән, сысҡандар ҙа юғалған. Быға беҙҙең ижади төркөм рейдҡа сыҡҡан Торлаҡ һәм төҙөлөш күҙәтеүе дәүләт комитеты хеҙмәткәрҙәре менән бергә инанды. Хатта йорт подвалдары ла таҙа ине.
Сысҡандарҙың юҡҡа сығыуы йорт биләмәләрендә кимереүселәргә ҡаршы эшкәртеү үткәртелеүгә лә бәйле. Роспотребнадзор ҡушыуынан һуң, идаралыҡ компаниялары урында 20 ағыулы ҡумта ҡуйған.
Шулай ҙа рейд барышында йорттар янында ҡарҙа сысҡан эҙҙәре табылды. Шул сәбәпле, Торлаҡ комитеты идаралыҡ ойошмаһына рәсми иҫкәртеү яһаны. Февраль аҙаҡтарына һауа торошо йылытыу сәбәпле, сысҡандарҙың тағы ла әүҙемләшеүе ихтимал. Был осраҡта урында йәшәүселәргә район йәки ҡала хакимиәтенә мөрәжәғәт итеү зарур.
Рәзилә Ғилметдинова
