«Айыҡ ауыл» республика конкурсы сиктәрендә Хәйбулла районы Федоровка ауылында төбәк-ара таҡмаҡтар конкурсы үтте. Бәйгелә хәйбуллаларҙан тыш, Баймаҡ районы һәм Ырымбур өлкәһенән йөҙҙән ашыу кеше ҡатнашты. Фольклор ансамблдәр, үҙешмәкәр коллективтар һәм айырым башҡарыусылар төрлө телдәрҙә сығыш яһаны. байрамға милли музыка ҡоралдары моңо йәнлелек өҫтәне.
Тамаша төрлө быуын вәкилдәрен берләштерҙе. Бәйге һөҙөмтәләре буйынса Гран-приҙы Маҡан ауылынан Антонина Фомина яулаһа, коллективтар араһында Баймаҡ районының «Зарифа» фольклор ансамбле еңеүсе тип танылды. Киләһе конкурс ике йылдан һуң ойошторолор тип көтөлә.
