Федор Шаляпин исемендәге музыка музейында донъя кимәлендә танылыу яулаған пианистка Вера Тиманова ижадына арналған кисә үтте. Вера Тиманова туғыҙ йәшендә тәүге тапҡыр Өфөлә сығыш яһай. Моцарт концертын һәм бер-нисә пьесаһын башҡара. Өс йылдан һуң 1868 йылдың 19 февралендә икенсе концерты үтә..Өфө меценаты 12 йәшлек пианистка Карл Таузигтың Фортепиано юғары мәктәбенә уҡырға инергә ярҙам итә. Вера Тиманова Рәсәйҙә бөтә ҙур ҡалаларҙа концерттар ҡуя, күп тапҡырҙар Европа илдәрендә сығыш яһай. Петр Чайковский яҡташыбыҙҙы юғары һәләтле артист тип таный, уға махсус әҫәрен бағышлай,ә композитор Ференц Лист беренсе дәрәжәле йондоҙ, тип атай. Вера Тиманова 1855 йылдың 18 февралендә тыуған, 1942 йылдың 20 февралендә Ленинград ҡамауында вафат булған.
