Былтыр республикала коммуналь инфраструктураны яңыртыу төбәк программаһын тормошҡа ашырыуҙың беренсе этабы тамамланды. Уға ярашлы 21 объектта реконструкция һәм капиталь ремонт уҙғарылғайны, 115 саҡрым инженер селтәрҙәр яңыртылды. Дөйөм финанс сығымдар 1 миллиард ярым һум тәшкил итте. Был турала Башҡортостандың торлаҡ-коммуналь хужалыҡ министрлығы менән төбәктең торлаҡ һәм төҙөлөш күҙәтеүе буйынса дәүләт комитетының берҙәм коллегия ултырышында билдәләнде. Сарала ведомстволарҙың бер йыллыҡ эшмәкәрлегенә йомғаҡ яһалып, киләһе айҙарға бурыстар ҡуйылды. Осрашыуҙа муниципаль власть органдарына «Уңайлы ҡала мөхитен булдырыу» федераль проектында ҡатнашыу шарттары һәм талаптары тураһында хәбәр иттеләр. Әйтәйек, программаны тормошҡа ашырғанда контракттар төҙөү ваҡыты 1 апрелгә тиклем дауам итһә, йыл аҙағынаса барлыҡ аҡсаларҙы үҙләштереү мотлаҡ.
Ултырыш барышында торлаҡ һәм төҙөлөш өлкәһендә күҙәтеү эшен һөҙөмтәле алып бурысы ҡуйылды, яуаплы ведомствоның граждандарҙың хоҡуҡтарын һәм мәнфәғәттәрен яҡлау буйынса вәкәләттәре көслө. Былтыр ғына комитет тарафынан меңдән ашыу иҫкәртеү сараһы уҙғарылған.
