Бер йәшлектә, бер ҡартлыҡта. Бөгөн Өфөнөң Октябрь районының ЗАГС бүлегендә 83 йәшлек Фәйзулла Сәғәҙиев менән 76 йәшлек Анна Шолохова законлы никахын теркәне. Ғаилә пары баш ҡалалағы «Именлек» республика геронтология үҙәгендә ғүмер итә. Өлкән йәштәгеләрҙең тантаналы көнө тураһында БЮТ хәбәрсеһе Рәмилә Исмәғилева яҙмаһында.
Ғүмер буйы көткәнде, ярты сәғәт тирәһе генә көтөү нимә инде. Хәйер, ЗАГС бүлегендә көтөүҙең һәр минуты сәғәткә тиң. Анна Александровна менән никах теркәргә килгән Фәйзулла Фәйзрахман улы паспортын онотҡан. Кәләш тулҡынлана.
Көттөргән кейәү килеп тә етте. 84-се йәше менән барған Фәйзулла Фәйзрахман улы хәрбиҙәрсә һөйләшә. Уға иһә «Именлек» геронтология үҙәгенә ҡайтып килеү өсөн трамвайҙы оҙаҡ көтөргә тура килгән.
Мендельсон маршы улаҙың икеһе өсөн дә икенсе тапҡыр яңғырай. Фәйзулла Фәйзрахман улының тормош иптәше баҡыйлыҡҡа күскән, ике ҡыҙы һәм ейәндәре бар, Анна Александрова йәшлек мөхәббәте менән оҙаҡ бергә тормаған, бер ҡыҙ үҫтергән, ейән- ейәнсәрҙәре Өфөлә йәшәй. Тик уларҙың береһе лә өлкәндәрҙе ҡотларға килмәгән. Зал тулы ҡунаҡтар ҙа, сәскә гөлләмәләре лә юҡ. Был союз Ер йөҙөндә уларҙың икеһе өсөн генә мөһим. 76 йәшлек кәләш менән 83 йәшлек кейәүҙең бармағын көмөш йөҙөк биҙәйәсәк.
Бәхетле пар вальста өйөрөлдө. Анна Александровна Именлек геронтология үҙәгендә өсөнсө йыл йәшәй. Фәйзулла Фәйзрахман улы дүртенсе ай. Концертта танышҡандан һуң улар ҡалған ғүмерҙәрен бергә үтергә ҡарар иткән.
Йыш булмаһа ла, өлкәндәр законлы никах теркәй. Өйләнешеүселәрҙе ЗАГС-ҡа үҙҙәренә генә билдәле маҡсаттар алып килә.
Загстан етәкләшеп сығып улар ҡайтыр яҡҡа йүнәлде. Бынан ары айырым бүлмәләрҙә түгел, бергә йәшәйәсәктәр. Сөнки законлы никахта торған парҙарға үҙәктә айырым бүлмә бирелә.
Рәмилә Исмәғилева
