Дәүләт Йыйылышы - Ҡоролтай тормошҡа ашырған проект уҡыусылар һәм урта профессиональ белем биреү учреждениелары студенттары өсөн тәғәйенләнгән. Уға ярашлы, дәрестәрҙә Бөйөк Ватан һуғышы тарихына арналған документаль фильмдар күрһәтелә. Йәмғеһе биш кинокартина һалдат ҡатын-ҡыҙҙар, Курск дуғаһында алыштар, һуғыш балалары, Ленинград ҡамауы һәм 112-се Башҡорт кавалерия дивизияһы тарихына арналған.
«Беҙҙең еңеү» мәғариф проекты Бөйөк Еңеүҙең 80 йыллығы, Махсус операцияла ҡатнашыусылар һәм уларҙың ғаилә ағзаларына ярҙам йылы уңайынан тормошҡа ашырыла. Документаль фильмдар «Мөһим ҡиммәттәр тураһында әңгәмә» дәрестәрендә күрһәтелер, тип көтөлә. Сара бөгөн башланып, 12 майға тиклем дауам итәсәк. Проект йәш быуында әүҙем гражданлыҡ позицияһы булдырыу, илһөйәрлек тәрбиәләүҙе маҡсат итеп ҡуя.
