Әбйәлил районының Буранғол һәм Асҡар ауылдары халҡы Башҡортостан министрлыҡтары һәм ведомстволары вәкилдәре менән осрашты. Көн тәртибенә райондағы экологик хәл сығарылды, планлаштырылған геологик разведка эштәре мәсьәләһе күтәрелде. Был хаҡта тулыраҡ киләһе яҙмала.
Район биләмәләрендә һунар итеү, һыу ресурстары экологияһы һәм янғын хәүефһеҙлеге мәсьәләләре. Буранғол ауылындағы күҙгә-күҙ ҡарашып әңгәмәләшеү майҙансығында был халыҡ тарафынан иң күп күтәрелгән һорауҙарҙың береһе булды.
«Янғын һүндереү-ҡотҡарыу көстәрен үҫтереү» төбәк программаһы буйынса ауыл советына яңы автомобилдәр һәм тағылма техника ла тапшырылған. Башҡортостандың ғәҙәттән тыш хәлдәр буйынса дәүләт комитеты рәйесе ауылдарҙың ирекле дружина ағзаларын республика уҡыу-методик үҙәге базаһында янғын һүндереү алымдарына өйрәтергә мөмкин, тип билдәләне.
Тирә-яҡ мөхитте һаҡлау, экологик хәүефһеҙлек мәсьәләһе һәр кемде борсой. Урындағы халыҡ уникаль тәбиғәттең, районды һәм күрше биләмәләрҙе һыу менән тәьмин иткән йылғаларҙың бысранмауы, уларға рекреация объекттарының йоғонтоһо, шулай уҡ тәбиғәт ресурстарын эшкәртеү өсөн борсола. Һүҙ- баҡыр запастарын эҙләү һәм асыҡлау буйынса планлаштырылған геологик разведка тураһында бара.
Белгестәр фекеренсә, тап ошо этаптарҙан һуң ғына табыш алыу тураһында ҡарар ҡабул итергә мөмкин. Әһәмиәтле тәбиғәт объекттары, шул иҫәптән Ҡырҡтытау һырты өсөн хәүеф юҡ, тип билдәләй компания вәкилдәре. Әгәр дәүләт экспертизаһынан ыңғай һығымта алынһа, инвестор предприятие төҙөйәсәк һәм мең ярым кешене эш урыны менән тәьмин итәсәк. Шулай уҡ үҙ иҫәбенә тау һөнәрҙәренә лә өйрәтергә әҙер.
Халыҡ борсолоуҙарын асыҡтан-асыҡ белдерҙе. Буранғолда йөҙ кеше менән осрашыуҙа конструктив әңгәмә ҡоролдо. Асҡарҙағы осрашыуға иһә 80 кеше килде, күпселек халыҡ Магнитогорскийҙан. Бындағы Һөйләшеү киҫкенерәк булды. Әбйәлилдәр ауылдаштарының үҙҙәрен дә тәбиғәт хаҡында онотмаҫҡа өндәне.
Ә шулай ҙа күпселек халыҡ тирә-яҡ мөхиткә һаҡсыл ҡарашта. Ауыл кешеләре даими рәүештә юл ситтәрен таҙарта. Машиналарҙан ташланған сүп-сарҙы йыйыштыра, йылға ярҙарында ағас ултырта. Оло Ҡыҙыл йылғаһы яры ла ял итеүселәр ҡалдырған сүп-сарҙан таҙартылды. Санитар өмәләрҙә активистар, район советы, ауыл биләмәләре депутаттары, йәмәғәт ойошмалары һәм ирекмәндәр әүҙем ҡатнашты.
Эксперттар иһә геологик разведка һәм ятҡылыҡтарҙы эшкәртеү рөхсәт ителә, сөнки был айырыуса һаҡланған биләмә түгел, тип билдәләй. Эште юғары экологик нормаларға ярашлы алып барыу планлаштырыла. Шул уҡ ваҡытта инвесторҙар муниципалитет үҫеше өсөн дә сығымдар һалырға ниәтләй. Бындай аңлатыу саралары һәр ауылда уҙғарыласаҡ.
Гүзәл Борханова
