Рәсәйҙең Ғәҙәттән тыш хәлдәр министрлығынан белдереүҙәренсә, бөгөн иртәнге сәғәт 10-сы ун минут тирәһендә “Свеча” предприятиеһында шартлау тураһында хәбәр килә. Алдан билдәле булыуынса, емереклектәр аҫтында бер кеше ҡалыуы ихтимал. Уны эҙләү буйынса барлыҡ кәрәкле саралар күрелә. Шулай уҡ өс ир ашығыс рәүештә ауыр хәлдә дауаханаға оҙатыла. Был турала үҙенең социаль селтәрҙәрендә Айрат Рәхмәтуллин яҙған. Башҡортостандың Һаулыҡ һаҡлау министры пациенттарҙың хәлен контроль аҫтында тотоуы тураһында хәбәр итә. 43 йәшлек ир Салауат ҡала дауаханаһында реанимацияла, предприятиеның тағы ике хеҙмәткәре Стәрлетамаҡҡа оҙатыла. Ваҡиға урынына 49 янғын һүндереүсе һәм 20 берәмек техника йәлеп ителгән. Әлеге ваҡытта янғын һүндерелгән, емереклектәрҙе таҙартыла. Осраҡ буйынса прокуратура тикшереү эше башлаған.
Рәсәй Тәфтиш комитетының Башҡортостан буйынса идаралығынан хәбәр итеүҙәренсә,Салауат ҡалаһындағы предприятиела сыҡҡан янғын осрағы буйынса сәнәғәт хәүефһеҙлеге талаптарын боҙоу тураһында енәйәт эше ҡуҙғатылған.
