Экологик акцияға Амангилде, Буранғол, Рауил һәм Хәлил ауылдарынан 150-гә яҡын кеше ҡушылды. Халыҡ бындай сараларҙа әүҙем ҡатнаша. Район халҡы автомобиль тәҙрәләренән юлға ташланған сүпте йыя, ағас ултырта, Оло һәм Кесе Ҡыҙыл йылғалары ярҙарын таҙарта. Ентекләберәк киләһе яҙмала.
Әбйәлил районы халҡы экологик өмәләрҙә тәүгә генә ҡатнашмай.Тап ошо ярҙарҙа халыҡ тәбиғәттә ял ойоштора. Көндәр йылыта башлау менән был биләмәлә ял итеүселәрҙән һуң күпләп көнкүреш ҡалдыҡтары өйөлөп ҡала. Шуға күрә әүҙем халыҡ, район советы, ауыл биләмәләре депутаттары, йәмәғәт берекмәләре һәм ирекмәндәр биләмәне таҙартырға сыҡты.
Тирә-яҡ мөхитте таҙартыу буйынса санитар өмәләр Амангилде, Буранғол, Рауил һәм Әбделмәмбәт ауылдарында үтте. Йыйылған сүп - сарҙы-полиэтилен тоҡсайҙарҙы, шешәләрҙе, быяла ҡалдыҡтарын өмәлә ҡатнашыусылар йөк машиналарына тейәне.
Осрашыу барышында Әбйәлил районы халҡы тау-байыҡтырыу комбинатын төҙөү мәсьәләһен күтәрҙе, уларҙың фекеренсә, ул тәбиғәт ҡомартҡыларын юҡ итеүгә һәм эсәр һыу сығанаҡтарына зыян килтереүе ихтимал. Компания вәкилдәре:» Был хәүефһеҙ проект һәм ул бөтә экологик стандарттарҙы үтәп төҙөләсәк» тип ышандыра. Бынан тыш, компания 1500 самаһы эш урыны булдырырға, халыҡты эшкә урынлаштырырға ниәтләй. Шулай уҡ улар тау-байыҡтырыу комбинатында эшләргә теләүселәрҙе таусы һөнәрҙәренә предприятие иҫәбенә уҡытырға ла әҙер.
Әбйәлилдәр ғәҙәттәгесә өмәләр үткәрә - йылға ярҙарын таҙарта, юл ситтәрендәге сүп-сарҙы йыйыштыра, ағастар ултырта. Был экологик акция тирә-яҡтағы таҙалыҡты тәьмин итеүҙән тыш, кешеләр менән аралашыу мөмкинлеген дә бирә.
Гүзәл Борханова
