Тылдағы ҡаһарманлыҡҡа ихтирам билдәһе. Өфөлә «Берҙәм Рәсәй» партяһының Йәмәғәт ярҙамы штабында бер төркөм әүҙем граждандар бүләкләнде. Иҫегеҙгә төшөрәбеҙ, Башҡортостан башлығы Радий Хәбиров башланғысы менән 2022 йылда район-ҡалаларҙа Миңлеғәле Шайморатов исемендәге ирекмәндәр штабы ойошторолдо. Бөгөн хәрәкәт мәктәп уҡыусыларынан алып хаҡлы ялдағыларға тиклем 15 меңгә яҡын кешене берләштерә. Берәүҙәр маскировка селтәрҙәрен үреү, окоп шәмдәрен эшләү менән шөғөлләнһә, икенселәр гуманитар ярҙам туплау буйынса эште үҙ өҫтөнә алған. Изге эшкә ҡушылыусылар араһында хәрбиҙәрҙең яҡындары ла күп.
