Был юлы Башҡортостандың Ғәҙәттән тыш хәлдәр буйынса дәүләт комитеты хеҙмәткәрҙәре үҙҙәре менән 11 йәшлек Кәрим Хәбибуллинды ла алды. Мәктәп уҡыусыһы йәмәғәт контролен башҡара һәм ул бындай рейдтарға йыш сыға. Инде биш йыл самаһы ул ведомствоның ирекмәне булып тора.
Кәрим Хәбибуллиндың эшкә яуаплы ҡарауын Башҡортостандың Ғәҙәттән тыш хәлдәр буйынса дәүләт комитеты рәйесе лә айырым билдәләп үтте. Кирилл Первов әйтеүенсә, теләгән һәр кем ведомствоның уҡыу-методика үҙәгендә ирекмәнлек буйынса махсус курс үтә ала. Шулай уҡ мәктәптәрҙә авария-ҡотҡарыу хеҙмәте белгестәре ҡатнашлығында асыҡ дәрестәр ҙә йыш ойошторола. Быларҙың барыһы ла балаларға һөнәр йүнәлешен билдәләүгә ярҙам итә.
