«Социаль үҙгәрештәр буйынса кәңәшселәр институты»ның дүртенсе модулендә ҡатнашыусылар Башҡортостандың ғаилә, хеҙмәт һәм халыҡты социаль яҡлау министры Ленара Иванова менән осрашты.
Ведомство етәксеһе төбәктә социаль өлкә үҫеше, яңылыҡтар менән таныштырҙы. Шулай уҡ студенттар өсөн тележурналист Әлиә Таһирова йәмәғәт киңлегендә социаль үҙгәрештәрҙең роле тураһында практикум уҙғарҙы. Мәғариф программаһына ярашлы, республиканың төрлө социаль учреждениелары эшмәкәрлеге менән таныштырыу маҡсатында экскурсиялар ҙа уҙғарылғайны, уңышлы практикалар өйрәнелә. Башҡортостан - социаль башланғыстарҙы тормошҡа ашырыу буйынса Рәсәйҙә алдынғы төбәктәр иҫәбендә. Әйтәйек, Өфө хосписы - ил кимәлендә тулыһынса хәйриә аҡсаларына төҙөлгән берҙән-бер ошондай учреждение.
Мәғариф программаһы илдең төрлө ҡалаларында ойошторола, уҡыу барышында дәүләт секторы, коммерция булмаған ойошмалар һәм бюджет учреждениелары етәкселәре эш процессын кеше мәнфәғәттәрен иҫәпкә алып һәм бер береһенең көслө яҡтарын ҡулланып үҙгәртергә өйрәнә.
