Башҡортостанда быйыл колледждарға 38 мең самаһы кеше уҡырға ингән, уларҙың 34 меңе - 9-сы класс сығарылыш уҡыусылары. Был турала бөгөн Дәүләт Йыйылышы-Ҡорлтайҙа уҙған “Хөкүмәт сәғәте”ндә Мәғариф министры Илдар Мәүләтбирҙин белдерҙе. Пленар ултырышта Республика башлығы Радий Хәбиров ҡатнашты. Ведомство етәксеһе билдәләүенсә, йылдан-йыл урта профессиональ белем алырға теләгән сығарылыш уҡыусылары һаны арта. Быйыл конкурста бер урынға 3 ярым кеше дәғүә иткән. Әлеге көндә колледжарҙа 119 меңдән ашыу кеше белем ала. 117 төр һәм 88 эш һөнәре буйынса белгестәр әҙерләнә.
Пленар ултырышта 40-лап закон проекты ҡаралды. Башҡортостанда Һалым түләтеүҙә автоматлаштырылған система индереү, файҙаланыуға тапшырылмаған күп фатирлы йорттарға капиталь ремонтҡа иғәнә йыйыу һәм башҡа ҡанун проекттары тикшерелде.
