Ауырғазы районы Вязовка ауылында тал сыбыҡтарынан мөғжизәле йыһаздар тыуҙырыусы оҫта йәшәй. Алексей Спиридоновтың ижади эштәре йорттарҙы биҙәй. Тал үреү сәнғәтен йәнләндереүсе, заманса һулыш биреүсе оҫта менән БЮТ хәбәрсеһе Гүзәл Борханова таныштыра.
Уның һәр көнө тәбиғәт менән аралашыуҙан башлана. Материалды ҡыш һәм иртә яҙ менән, тал сыбығы көслә мәлдә әҙерләй. Алексей Спиридонов үҫентеләрҙе һайлап, оҙон, тигеҙҙәрен ала, һығылмалылығын тикшерә.Әгәр тал сыбығы тыңлаусан рәүештә ҡулын уратып алып, элекке хәленә әйләнеп ҡайтһа, тимәк, ул эшләйәсәк предметтың бер өлөшө буласаҡ.
Алексей Спиридонов эшләгән был әйберҙәр көнкүреш йәки биҙәүсе әйбер генә түгел, ә һөнәрсе теле менән һөйләнелгән бәләкәй тарих. Нәфис кәрзиндәрҙә һәм панноларҙа, үҙенсәлекле сувенирҙарҙа оҫтаның материалға ҡарата һаҡсыл мөнәсәбәте, һығылмалы тал сыбығында ысын сәнғәт әҫәрҙәрен ижад итеүсе көстө тоя белеүе һоҡландыра.
Тал сыбығынан һығылмалы таҫмалар эшләү станогын оҫтанан һатып алған. Бәүелсәк-кресло өлөштәренләге деталдәрҙе бөгөү өсөн иһә үҙе эшләгән махсус ҡалыптар ҡуллана. Алексей һәр әйбергә күңел йылыһын һала, элементтарҙы түҙемлек менән бәйләй. Уның ҡулында тал, тәбиғи һығылмалылығын һәм йылылығын һаҡлап, тейешле форманы ала.
Уңайлы кәрзиндәр, нәфис вазалар;ағас тамырҙары көсөн туплаған ныҡлы ҡумталар;тәбиғәт менән бәйләнеште тойорға саҡырыусы еңел бәүелсәк-креслолар,семәрләнгән әйберҙәр ҡулланылған материал оҫта ҡулына килеп эләккәнсе елгә бөгөлөп торған. Ә был ҡумталар хазинаналарҙан тыш, оҫта ҡулдарының йылыһын да һаҡлаясаҡ.Алексей Спиридоновтың һәр эше-донъяға тыуҙырылған һәм ижад ителгән затлы бүләк.
Алексей Спиридоновтың оҫталығы-үткән һәм хәҙерге заман араһындағы тере күпер, ул быуаттар төпкөләнән килгән тал үреү традицияларын биҙәү-ҡулланма сәнғәтендәгн заманса алымдар менән тоташтыра. Оҫта ижад иткән әйберҙәр үҙендә тыуған ер йылыһын, эстетиканы һәм һөнәрселеккә ихлас һөйөүҙе сағылдыра.
Гүзәл Борханова
