Күмәкләгән-яу ҡайтарған. Шишмә районында йәшәүсе Ғәббәсовтар ғаиләһе яугирҙарға гуманитар ярҙам әҙерләй, шеврондар тегә. Йүнселдәр әлеге шөғөл серҙәренә балаларын да өйрәтә. Был хаҡта тулыраҡ киләһе яҙмала.
Был бинала теген һәм сигеү машиналары иртәнге 11ҙән киске 7 гә тиклем эшләп тора. Тап сәғәт етелә әсә өлкән ҡыҙын мәктәптән алырға тейеш. Ә ял көндәре Лиана, Диана һәм Тамерлан төп ярҙамсыға әйләнә.Тамерлан да бер-нисә йыл элек тегергә өйрәнгән.Бәләкәстәре 9 айлыҡ Эмилинаға иһә апайҙары һәм ағаһы эшләгәнен күҙәтеп торорға ғына ҡала.
Алғы һыҙыҡтағы яугирҙарға мендәр тултырыу өсөн апалы-һеңлеле Лиана менән Диана яуаплы.
Ә был машинала яугирҙарға шеврондар сигелә. Регина Ғәббәсова дәүләттән ярҙам алып артабан да эшен киңәйтергә иҫәп тота. Тиҙҙән был цехҡа дәүләт ярҙамы менән алынған заманса сигеү машинаһы ҡуйыласаҡ.
Ғаиләләге уртансы ҡыҙ Диана киләсәктә әсәһе юлын һайламаксы. Уның да хыялы тегенсе булыу.
Баш һәм өҫ кейемдәренә биҙәү элементтарын Регина үҙе уйлап таба. Спорт костюмында башҡорт һылыуҡайы, жилеттарҙа, футболкаларҙа Башҡортостан картаһы, байрағы, ҡурай сәскәһе.Кейемдәргә сигелгән элементтар туристарға һәм республикаға килгән ҡунаҡтарға төбәкте яҡшыраҡ танытыу мөмкинлеген биреү маҡсатында ҡулланыла.
Был цехта яугирҙарға йомшаҡ мендәрҙәр, шеврондар тегелә. Регина Ғәббәсова баш кейемен башҡорт нағыштары менән биҙәгән. Ғәббәсовтар ғаиләһе ике тиҫтәнән ашыу кейем-һалымды сигеү элементтары һәм Башҡортостан артибутикаһы менән биҙәй. Улар етештергән кейем Рәсәй төбәктәренән тыш, хатта Анголала ла ихтыяж менән ҡулланыла.
Гүзәл Борханова
