«Минченко консалтинг» коммуникация холдингы былтыр декабрҙә Рәсәй субъекттары башлыҡтарының халыҡ-ара бәйләнештәр тығыҙлығы индексына йомғаҡ яһаны. Радий Хәбиров рейтингта үҙ позицияһын нығытып, икенсе урын яуланы. Эксперттар билдәләүенсә, Башҡортостан төбәк иҡтисадының яңы үҫеш нөктәләрен булдырып, халыҡ-ара хеҙмәттәшлекте әүҙем киңәйтә. Индекс һөҙөмтәләре төбәк етәкселегенең тышҡы иҡтисади йүнәлештәге системалы эшен раҫлай, ә Радий Хәбиров Рәсәйҙе танытыу буйынса халыҡ-ара тректа иң яуаплы бурыстарҙы ышанып тапшырған губернаторҙар пулына инә.
Шулай уҡ Радий Хәбиров сәйәси һәм иҡтисади коммуникациялар агентлығы рейтингында 5-се баҫҡысты биләй, ә һуңғы аҙнала социаль селтәрҙәрҙә төбәктәрҙең ун әүҙем етәксеһе исемлегендә үҙ позицияһын нығытты. Рейтингта төбәк башлыҡтарының рәсми аккаунттары анализлана, ә әүҙемлек индексы «Бәйләнештә», «Синыфташтар» һәм Telegram социаль селтәрҙәре күрһәткестәре нигеҙендә иҫәпләнә, шул иҫәптән баҫмалар, лайктар, комментарийҙар һәм репостар һаны, шулай уҡ контенттың сифатлы параметрҙары һәм аудитория реакцияһы ҡарала.
