Өфөлә дауаханаларға донорҙар йәлеп итеү өсөн хәйриә концерты үтте. Ирекмәндәр, эшҡыуарҙар һәм хәйриә ойошмалары Республика ҡан тапшырыу станцияһы сәхнә артистары менән берлектә акция үткәрҙе. Донорҙар сафын тулыландырыу маҡсатында ойошторолған сарала бүләктәр ҙә таратылды. Ойоштороусылар әйтеүенсә, ҡан биреүсене пациентҡа ғүмер бүләк итеүсегә тиңләргә мөмкин. Республика дауаханаларында йылдан-йыл ҡан күҙәнәктәренә ихтыяж арта. Шуға ла был изге эшкә граждандарҙы йәлеп итеү мөһим. Ҡанды 18 йәше тулған һау-сәләмәт кешеләр тапшыра ала.
