Сауҙа баш ҡалала өс урында-Рабкоров урамында, Серго Орджоникидзе исемендәге һәм Спорт һарайы алдындағы майҙандарҙа ойошторолған. Ауыл хужалығы продукцияһын етештереүселәр тәү сиратта ит һәм һөт ризыҡтары, бал, йәшелсә-емеш тәҡдим итә. Һатыусылар әйтеүенсә, баҙарға кешеләр экологик яҡтан таҙа, сифатлы аҙыҡ-түлек эҙләп килә. Сөнки бында фермер йәки шәхси хужалығында үҫтерелгән продукция тәҡдим ителә.
Сауҙа рәттәрендә иттең йәнең теләгәнен алырға мөмкин, бында һыйыр, йылҡы, сусҡа ите лә, ҡош-ҡорт та һатыла. Һатып алыусылар әйтеүенсә, һайлау мөмкинлеге бар. Хаҡтарға мөнәсәбәт төрлөсә, берәүҙәр ул тешләшә тип иҫәпләй, икенселәре юғары сифатлы, экологик яҡтан таҙа продукция арзан булмай тигән фекерҙә.
