Өфө дәүләт нефть техник университетында иретеп-йәбештереүселәрҙең атом полигоны эшләй башланы. Ул илдең ҡеүәтле сәнәғәт предприятиелары һәм тәү сиратта «Росатом» өсөн кадрҙар әҙерләйәсәк.
Иретеп-йәбештереүселәрҙең атом мәктәбе илдең тиҫтәнән ашыу төбәгендә эшләп килә, Өфөләге үҙәк 15-се. Уҡытыу полигонын асыу еңел генә түгел, бының өсөн матди-техник база, теоретик нигеҙ, юғары квалификациялы белгестәр булыуы мөһим. Өфө дәүләт нефть техник университеты бар талаптарға ла яуап бирә. Уҡыу йорто «Росатом» менән берлектә студенттар өсөн дәреслек сығарған, уның эсендә видеодәрестәр ҙә ҡаралған. уларҙы куаркод буйынса үтеп ҡарарға мөмкин. Илдең башҡа вуздары ла ошо китап буйынса белем бирә. Матди-техник база ла ныҡ, полигонда халыҡ-ара стандарттарға яуап биргән заманса ҡоролмалар ҡуйылған. Һәм иң мөһиме кадрҙар. Үҙәктә юғары квалификациялы белгестәр эшләй. Мәҫәлән, Рузел Закиров иретеп-йәбештереүселәрҙең атом мәктәбе оҫтаһы исемен йөрөтә. Былтыр Милли чемпионатта икенсе урын яулаған Валерия Ғәлләмова тап уның уҡыусыһы.
