Республика стоматология поликлиникаһында имплант ҡуйыуҙа ҡулланылған хирургия шаблондары етештерелә башланы. Теш техник лабораторияһында ортопедия ҡулайламаларын 3д-моделләштереү һәм әҙерләү буйынса тулы производство циклы ойошторолған, шулай уҡ бында цирконий коронкалары сығарыла. БЮТ хәбәрсеһе Гөлназ Хәйбуллина дауам итә.
Тештәрҙе хирургик ысул менән дауалауҙа заманса алымдар. Республика стоматология поликлиникаһы белгестәре операцияларҙы юғары теүәллек менән башҡарыу маҡсатында компьютер технологиялары ҡуллана. Ғинуарҙан медицина учреждениеһы лабораторияһында теш имплантаттарын ҡуйыуҙа файҙаланылған навигация шаблондары етештерелә башлаған.
Поликлиника стеналарында яңы производство асылыуы-имплантация операцияларын башҡарыу ваҡытын тиҙләткән. Дауалау сифаты ла юғары. Бер ай эсендә генә хирургия шаблондары ҡулланып тиҫтәгә яҡын әмәлиәт уҙғарылған. Һанлы теш техник лабораторияһына килгәндә, ул былтыр июлдә асылғайны. Заманса ҡорамалдар менән йыһазландырылған Бөгөн бында цирконийлы теш коронкалары ла етештерелә, республика медицина учреждениелары менән хеҙмәттәшлек тураһында килешеүҙәр төҙөлгән.
Ярты йыл эсендә поликлиникала ҡуйылған теш иплантаттары күләме лә 25 процентҡа артҡан. Медицина хеҙмәткәрҙәренең һөнәри үҫеше өсөн дә шарттар тыуҙырылған, уҡыуҙар ойошторолған. Һанлы стоматология буйынса белгестәр әҙерләнгән. Дауалауҙағы яңы алымдар, тәү сиратта, пациенттарға ҡарата хәстәрлек билдәһе. Өфө районынан Илүзә Дәминова ла теш ҡуйҙыртыу буйынса оҙайлы процесты башлаған.
Стоматологияла һанлы технологиялар ҡулланыу тәжрибәһен Башҡортостан буйынса таратыу маҡсаты ҡуйылған. Проект төбәктең һаулыҡ һаҡлау министрлығы тарафынан да юғары баһаланған.
Республика стоматология поликлиникаһына район-ҡалаларҙа йәшәүсе пациенттарҙың тештәре тураһында барлыҡ мәғлүмәт дистанцион форматта ла ҡабул ителә башлаясаҡ. Бының өсөн медицина учреждениелары сканер аша үткәрелгән тештәр моделен электрон файл менән ебәрергә тейеш. Артабан һанлы лабораторияла ошондай металл ҡулланылмаған коронкалар эшләнә. Был инде етештереү ҡеүәтен күпкә арттырырға булышлыҡ итәсәк.
Гөлназ Хәйбуллина
