Зубрҙар үрсетеү буйынса Башҡортостан проекты президент тәбиғәт фондының 10 миллион 200 мең һумлыҡ грантын алды. Был аҡсаға республиканың айырыуса һаҡланған тәбиғәт биләмәләре буйынса дирекцияһы Белоруссиянан тағы ла 9 өлкән хайуан килтерергә ниәтләй. Радий Хәбиров социаль селтәрҙәге сәхифәһендә яҙыуынса, был экологик проект 2023 йылдан тормошҡа ашырыла. Ошо ваҡыт эсендә зубрҙар һаны 25 башҡа етә, шул иҫәптән 8 быҙау беҙҙең республикала тыуған. 2030 йылға хайуандарҙың һанын 50-гә еткереү ҡарала. Был проект ярҙамында республика Рәсәй президенты ҡуйған биологик төрлөлөктө һаҡлау буйынса мөһим дәүләт бурысын үтәй. Башҡортостан-илдең тәбиғи мөхиттә зубрҙар йәшәгән берҙән-бер төбәге. Уларҙы «Мораҙым тарлауығы» тәбиғәт паркы биләмәһендә осратырға мөмкин.
