Рәсәйҙең Һаулыҡ һаҡлау министры Михаил Мурашко Башҡортостанды беренсел звеноны яңыртыу буйынса программаны уңышлы тормошҡа ашырған төбәктәр иҫәбендә билдәләне. Был хаҡта ул Владимир Путин рәйеслегендә уҙған Хөкүмәт ағзалары менән кәңәшмәлә хәбәр итте. Былтыр ғына республикала программаны тормошҡа ашырыуға 5 миллиард 700 миллион һум аҡса йүнәлтелгән, шуның 3 миллиард ярымы-федераль бюджеттан бүленгән. Төбәктә 6 поликлиника, 134 модулле медицина учреждениеһы төҙөлгән, 9 объектҡа капиталь ремонт үткәрелгән, 5 мең берәмектән ашыу медицина ҡорамалдары, 99 санитар автомобиль һатып алынған. Бынан тыш, ауыл ерендә йәшәүселәргә лә сифатлы медицина яҡыная. Башҡортостан-Рәсәйҙә фельдшер-акушерлыҡ пункттарын яңыртыу буйынса лидер. Республикабыҙҙа ике меңдән ашыу ФАП эшләй, уларҙың һәр өсөнсөһө төҙөкләндерелгән.
