Башҡортостан командаһы Рәсәйҙә тәүге ун командаға инә. Былтыр студенттар 40-тан ашыу миҙал яулаған. “Был күрһәткес урта һөнәри белем биреү өлкәһендә кадрҙар әҙерләү юғары кимәлдә булыуын иҫбатлай”, - тип белдерҙе Радий Хәбиров. Республика башлығы “патриот” паркында чемпионат лидерҙары менән осрашты.
“Патриот” паркында үткән сарала һөнәри оҫталыҡ конкурсында еңгән 150 студент ҡатнашты. Улар тиҙҙән төбәк-ара чемпионатта республика данын яҡлай. Башҡортостанда 90-дан ашыу колледжда 120 мең ҡыҙ һәм егет белем ала. Белем биреү учреждениеларын яңыртыуға ҙур иғтибар бүленә, ти республика Мәғариф министры Илдар Мәүлитбирҙин.
30 апрелдә Рәсәйҙә профессионалдар чемпионатының төбәк-ара этабы еңеүселәре асыҡлана. Артабан финалистар Бөйөк һәм Түбәнге Новгород, Калуга, Санкт-Петербург предприятиеларҙа һынау үтә.
