Унынсы йыл рәттән үткәрелгән Бөтә Рәсәй акцияһы сиктәрендә ата-әсәләр балалар өсөн ҡаралған һынауҙарҙы үтте. Баш ҡаланың 38-се мәктәбендә үткәрелгән сарала ата-әсәләр рус теле буйынса белемен тикшереп ҡараны. Имтиханда барыһы ла ғәҙәти ҡағиҙәләр буйынса ойошторолдо-ингән урында металл эҙләүсе ҡоролма, коридорға мобиль элемтә сигналын баҫыусы станциялары ҡуйылды. Акция ата-әсәләргә балаларҙың тулҡынланыуын аңлап имтихан ваҡытында тыныслыҡ һаҡлау, уҡыусыларға рухи ярҙам итеү өсөн ҡаралған.
Ойоштороусылар әйтеүенсә, был акция ата-әсәләргә һынауҙың ҡатмарлы түгеллеген аңларға, психологик күҙлектән тынысланырға ярҙам итә. Сөнки күп осраҡта өлкәндәр уҡыусыларға ҡарағанда ла нығыраҡ хафаланып балаларҙың әҙерлегенә һәм тотороҡлоғона йоғонта яһай.
