Туймазы районының «Бабай Утары» этнографик комплексы аренаһында Кекусин-каратэ һәм Кекусин-нунчак буйынса Евразия чемпионаты һәм беренселеге үтте. Спорт сараһы Халыҡтар дуҫлығы йылына һәм Еңеү көнөнә арналды.
Өсөнсө тапҡыр ойошторолған ярышта Башҡортостандың төрлө ҡала-райондарынан, Новосибирск, Һамар, Тольятти ҡалаларынан, Пермь крайынан, Ингушетия, Ҡабарҙы-Балкар республикаларынан 200-ҙән ашыу көрәшсе ҡатнашты. Спортсыларҙың барыһы ла күп тапҡыр халыҡ-ара турнирҙар һәм Рәсәй беренселеге чемпиондары. Ярышты Кекусин -каратэ буйынса тренер, ҡара билбау эйәһе Зөфәр Ҡорбанғәлиев ойошторған. Ул 30 йылдан ашыу Туймазы каратэ мәктәбендә спортсылар тәрбиәләй, уҡыусыларының 50-нән ашыуы ҡара билбау эйәһе. Зөфәр Миңлеғәле улының был спорт төрөнә һөйөүе ғаиләһенә лә күскән, Евразия чемпионатын уҙғарыуға уның ғаилә ағзалары ла күп көс һалған.
