Тымау, күҙ йәшкәҙәүе, сөскөрөү-был билдәләрҙе һалҡын тейеү менән бутарға мөмкин. Әммә уға ҡайын бөрөләнеүе һәм башҡа ағастарҙың сәскә атыуы ла сәбәпсе булыуы ихтимал. Республикала йәшәүселәрҙең ҡайһы берҙәре был миҙгелде сит илдә үткәрергә ашыға, икенселәр-аллергияға ҡаршы яңы вакцина көтә. Тулыраҡ БЮТ хәбәрсеһе Әлфинә Килдейәрова.
Аллергия миҙгеле башланыу менән пациенттар ҙа арта. Табип-аллерголог Ләйсән Мансурова белдереүенсә, илдә йәшәүсе халыҡтың 15-25 проценты өсөн ағастарҙа тәүге бөрөләр күренә башлауы-һынауға тиң. Тымау, күҙ йәшкәҙәү, сөскөрөү-аллергияның тышҡы билдәләре. Уны йыш ҡына киҫкен респиратор инфекция менән бутаған осраҡтар ҙа була.
Дөрөҫ терапия билдәләргә аллергендарҙы асыҡлау процедураһы ярҙам итә. Тест ни бары 15-20 минут талап итә. Ғалимдар фекеренсә, ғәҙәттә, аллергия бала саҡта уҡ башлана. Әммә сир өлкән йәштә лә барлыҡҡа килеүе ихтимал. Был иммунитеттың ябай матдәләргә, шул иҫәптән һеркәгә икенсе төрлө яуап бирә башлауына бәйле. Был билдәләр Фидан Монасиповҡа ла яҡшы таныш. Яҙ етеү, сәскә атыу менән аллергия башлана, ти ул. Сирҙән сит илгә сәйәхәт ҡотҡара
Табиптар әйтеүенсә, аллергия ҡапыл башлана һәм аллергендарҙың әүҙем осоро баҫылғансы дауам итә. Айырым осраҡтарҙа хатта, бер нисә айға һуҙылыуы ихтимал. Яҡын арала сәскә атыу миҙгелен сит илдә үткәрергә кәрәк булмаясаҡ, тигән фекерҙә Башҡорт дәүләт медицина университеты ғалимдары. Фармацевтика факультеты аллергияға ҡаршы яңы вакцина булдырыу өҫтөндә эшләй. Ғалимдар тәүге өмөтлө һөҙөмтә лә алған. Барлыҡ һынауҙар уңышлы үткәндә прививканы киләһе миҙгелдә яһатырға мөмкин буласаҡ.
Әлфинә Килдейәрова
