Аяҡһыҙ ҡалһа ла, рух һынмаған. Махсус хәрби операцияла аяғын юғалтып демобилизацияланған Андрей Константинов бөгөн дә әүҙем тормош менән йәшәй. Хәрби бәрелештәр ветераны йәмәғәт эштәрендә лә ҡатнаша, яуҙан ҡайтҡан егеттәргә ярҙам итә. Андрей Константинов менән БЮТ хәбәрселәре лә осрашты.
Андрей өсөн һуғыш тамамланған. Хәрби кейем дә хәҙер шкафта эленеп тора. Яугир уны ара-тирә сығарып миҙалдарын ғына һөртөп тора. Наградаларҙың һәр береһе минең өсөн ҡәҙерле, ти ул. Айырыуса Суворов миҙалы. Уны Андрейға яуҙаштарын ҡотҡарған өсөн бирәләр. Ә бына «Батырлыҡ ордены» бер нисә нацисты дөмөктөргәне өсөн. Аяғын да ул тап ошо бәрелештә юғалта.
Махсус хәрби операцияның тәүге көндәренән үк Андрей пилотһыҙ осоу аппараттары операторы булып хеҙмәт итә. Разведка, һөжүм итеү дрондарында ла оса. Коптерҙар менән оҫта идара итеүсе яугир дошмандың «мәскәй әбейен» дә бәреп төшөрә ала.
Андрей тормош иптәше Валерия менән ҡыҙ тәрбиәләй. Махсус хәрби операция иремде ныҡ үҙгәртте. Аяҡһыҙ ҡалһа ла хәҙер нығыраҡ, ышаныслыраҡ баҫып тора, ти Валерия.
Андрей әле махсус хәрби операциянан ҡайтҡан яугирҙарға ярҙам күрһәтеү менән дә шөғөлләнә, йәмәғәт эштәрендә ҡатнаша. Артабанғы тормошон спорт менән дә бәйләргә ниәтләнә. Ныҡыш егетте следж-хоккей командаһына ла саҡырғандар.
А.Кәбиров
