73-сө йәшендә, оҙаҡ ауырығандан һуң, Дәүләт Йыйылышы -Ҡоролтай рәйесе Константин Борисович Толкачев арабыҙҙан китте. Ҡайғылы хәбәрҙе Башҡортостан башлығы Радий Хәбиров хөкүмәттең аҙналыҡ оперативкаһында белдерҙе. Константин Толкачевтың хәтерен бер минутлыҡ тынлыҡ менән иҫкә алдылар.
Константин Борисович 1953 йылдың 1 мартында Кемеров өлкәһендә тыуған. Эске эштәр министрлығының Рязань юғары мәктәбен, СССР-ҙың эске эштәр министрлығы академияһын тамамлаған. Хеҙмәт юлын Кузнецк металлургия комбинатында торбалар иретеп -йәбештереүсе ярҙамсыһы булып башлай. Әрменән һуң эске эштәр министрлығы системаһында эшләй. Отставкалағы Генерал-майор 1999 йылда закондар сығарыу өлкәһендә эшмәкәрлеген башлай. 2008 йылдан алып Дәүләт Йыйылышы-Ҡоролтай рәйесе. Константин Толкачев Рәсәй һәм Башҡортостандың атҡаҙанған юрисы, Почет, Башҡортостан республикаһы алдындағы ҡаҙаныштары һәм Салауат Юлаев ордендары кавалеры. Башҡортостандың хоҡуҡи һәм ҡануни үҫешенә баһалап бөткөһөҙ өлөш индергән шәхес.
