Дәүләкән-Талбазы юлында Дим йылғаһы аша күперҙә ремонт эштәре дауам итә. Оҙонлоғо 209 метрлыҡ күперҙең һул яҡ һыҙатында ремонт-төҙөлөш эштәре барышын БЮТ ижади төркөмө лә күҙәтте. Ентекләберәк БЮТ хәбәрсеһе Гүзәл Борханова репортажында.
Дәүләкән-Талбазы юлында Дим йылғаһы аша күпер «Тормош өсөн инфраструктура» милли проекты буйынса ремонтлана. Эшселәр күпер араларындағы плитәләрҙе һәм тимер-бетон балкаларҙы алмаштыра, ҡоролманың һәр өлөшө яңыртыла.
Күпер ныҡлы һәм ышаныслы булырға, оҙаҡ йылдар хеҙмәт итергә тейеш. Төҙөүселәргә тейешле консистенциялы шыйыҡ асфальт-бетон ҡатнашмаһы махсус автоцистернала килтерелә.
Дәүләкән ҡалаһы эргәһендәге Дим йылғаһы аша күпер район халҡы, ҡалаға Р-240 Өфө-Ырымбур федераль трассаһы яғынан инеүселәр өсөн дә мөһим. Бында йәмәғәт транспорты һәм мәктәп автобустары ла йөрөй. Был юлдан- Асылыкүлгә юлланған туристар ҙа файҙалана. Трафик тәүлегенә 1800 машинаға етә. Юл йөрөүсе халыҡ күперҙең тулыһынса файҙаланыуға тапшырылыуын түҙемһеҙләнеп көтә.
Күперҙең уң яҡ яры матрас рәүешендәге габиондар ярҙамында нығытылған, ә өҫкө конусҡа монолит плитәләр түшәләсәк. Обьектты октябрь аҙағына файҙаланыуға тапшырыу күҙаллана.
Гүзәл Борханова
