«Шүлгәнташ» тарихи-мәҙәни ҡурсаулығы Дмитрий Лихачев исемендәге Музей эше өлкәһендәге 3-сө Милли премияла «Милли байлыҡ» номинацияһында еңеү яуланы. Был хаҡта Радий Хәбиров үҙенең социаль селтәрҙәрендә хәбәр итте. Башҡортостан проекты Рәсәйҙең алдынғы музейҙары һәм ҡурсаулыҡтары-«Петергоф», «Бородин яланы», «Сталинград алышы» һәм башҡа меңдән ашыу ғариза араһынан һайлап алынған. «Шүлгәнташ»-Рәсәйҙә палеолит осорондағы ҡая сәнғәтенә бағышланған беренсе һәм әлегә берҙән-бер музей, ул ЮНЕСКО-ның «Бөтә донъя мираҫы» исемлегенә индерелгән, тип яҙа Радий Хәбиров. Башҡортостан башлығы барыһын да Бөрйән районында урынлашҡан ғәжәйеп музей менән танышырға саҡырҙы.
