Ул яр буйында ял итеүселәрҙең хәүефһеҙлеген тәьмин итергә ярҙамлаша. Яһалма зиһен менән йыһазландырылған камералар һыу инеүселәрҙе күҙәтә, билдәләнгән урындан ситкә сыҡҡан йөҙөүселәр тураһында ҡотҡарыусыларға хәбәр итә. Аҡыллы система былтыр сафҡа индерелә. Иҫегеҙгә төшөрәбеҙ, Башҡортостанда һыу инеү миҙгеле 1 июндән старт алғайны. Әммә ҡотҡарыусылар майҙан алып дежурҙа. Бәхеткә, ошо ваҡыт эсендә һыуҙа зыян күреүселәр юҡ. Былтыр иһә 50 кеше ҡотҡарылған.
Яһалма зиһен ярҙамында эшләүсе камералар әлегә Өфөнөң ике биләмәһендә ҡуйылған. Улар-Киров районының «Солнечный» һәм Калинин районының «Гольфстрим» пляждарында. Киләсәктә уларҙың һанын күбәйтеү һәм баш ҡаланың барлыҡ 9 пляжын да аҡыллы камералар ярҙамында күҙәтеү планлаштырыла. Бындай системаның булыуы ҡоҡарыусыларҙы алмаштырмай, ә белгестәргә һыу инеүселәрҙе күҙәтергә, зыян күреүселәрҙе ваҡытында асыҡларға һәм кеше ғүмерҙәрен һаҡлап ҡалырға ярҙам итәсәк.
