Өсөнсө Бөтә Рәсәй фольклориадаһы сиктәрендә «Торатау» Конгресс-холлында «Фольклор һәм балалар. Традициялар аша бөгөнгөгә» тип исемләнгән ғилми-ғәмәли конференция үтте. Рәсәй ғалимдары, фольклор өлкәһе белгестәре, ижади коллектив етәкселәре ҡатнашлығында ойошторолған сарала халыҡ ижадының балалар тәрбиәһенә бәйле мәсьәләләре күтәрелде. БЮТ хәбәрсеһе Азат Ғәлиуллин дауам итә.
Ленинград өлкәһенән килгән ҡыҙҙар ижади коллективта шөғөлләнеп кенә ҡалмай, фольклор экспедицияларға ла йыш сыға. Шуға ла улар халыҡ традицияларын юғалтмай, тиҫтерҙәштәре менән бүлешә, киләһе быуынға ла ҡалдыра. Уның ҡарауы, традицион кейем элементтарын да онотмай.
Ғилми-ғәмәли конференция тап ошо маҡсатта ойошторола ла инде. Бөтә Рәсәй балалар фольклориадаһы, ғөмүмән, йыр-бейеүҙе берләштергән мәҙәни форумдан бигерәк, ғалимдар өсөн күңел һалып эшләрлек майҙансыҡ та булып тора.
Мәҙәни сара үҙенә күрә тәжрибә мәктәбе. Рәсәйҙең төрлө төбәктәренән килгән ижади коллективтар үҙ ерлегенә хас фольклор үҙенсәлектәрен күрһәтә. Уларҙа халыҡ хәтере, ата-бабаларҙан ҡалған мираҫ ята. Тик ғилми яҡтан өйрәнәһе, китаптарҙа мәңгеләштерергә лә кәрәк. Ошо нигеҙҙә генә быуындар күсәгилешлеген һаҡларға мөмкин, ти белгестәр.
Трансформация дәүерендә күләме мәҙәни форумдарҙың үтеүе үҫеп килеүсе быуын өсөн мөһим ҡала. Улар ҡатнаша, тамаша ҡыла, тәжрибә туплай.
Ғилми-ғәмәли конференция эшлекле шарттарҙа үтте. Рәсәй төбәктәренән килгән белгестәр, ижади коллектив етәкселәре үҙ ерлегенә хас халыҡ уйындары, балалар ҡатнашлығындағы ялан экспедициялары һөҙөмтәләрен, рухи-мәҙәни тәрбиә биреүҙәге уңыштарын барланы. Эшлекле осрашыу киләсәктә тормошҡа ашырыласаҡ мәсьәләләрҙе барлаған резолюция ҡабул итеү менән тамамланды.
Азат Ғәлиуллин
