Ҡаланың көньяғында урынлашҡан ҡәберлектә студенттар, ирекмәндәр, шулай уҡ Археологик сығанаҡтарҙы өйрәнеү үҙәге белгестәре эшләй. Һәйкәл ғалимдар тарафынан күп йылдар дауамында өйрәнелә. БЮТ хәбәрсеһе Азат Ғәлиуллин дауам итә.
Һәр табылған артефакт ҡабатланмаҫ һәм үҙенсәлекле. Айырыуса, бахмут мәҙәниәтенә, йәки өсөнсө-һигеҙенсе быуатҡа ҡараған биҙәүес әйберҙәр төрлөлөгө һоҡландыра. Шулай уҡ көнкүрештә һәм һунарсылыҡ өлкәһендә файҙаланылған ҡомартҡылар ҙа күп сер һаҡлай.
Өнһөҙ ҡомартҡыларҙың төҫтәр төрлөлөгө лә иғтибарҙһы йәлеп итә. Бронза, тимерҙән эшләнгән биҙәүестәр ситтән алыныуы ихтимал. Тимәк, урында сауҙа булған. Малсылыҡ, ер эшкәртеү менән дә шөғөлләнгәндәр. Табылған әйберҙәр төрлө өлкә ғалимдары өсөн ҡыҙыҡлы булмаҡсы.
Федераль кимәлдәге тарихи һәйкәлдә ҡаҙыныу эше беренсе йыл ғына башҡарылмай. Бөрө ҡәберлеге 1901 йылда табыла, әммә уны ентекле өйрәнеү ярты быуат тирәһе ваҡыт үткәс кенә-Нияз Мәжитов етәкселек иткән экспедициялар ваҡытында башлана. Әле эште Башҡортостан Милли музейы менән Археологик сығанаҡтарҙы өйрәнеү үҙәге һәм Тарих, тел һәм әҙәбиәт институты дауам итә. Әлегә ҡәберлектең яҡынса 15 проценты ғына өйрәнелгән. Ғалимдарға ирекмәндәр ҙә ярҙам итә.
Азат Ғәлиуллин
