Бөгөн баш ҡалала билдәле Рәсәй һәм Америка пластик хирургы Хәсән Баиев республика табибтары менән осрашты. Хәсән Баиев Чечен республикаһында тыуған. Локаль бәрелештәр ваҡытында хәрби хирург булып эшләгән. Табип пластик хирургияла уңышлы операциялар яһауы менән данлыҡлы. Хәйриәлек менән шөғөлләнә һәм мохтаждарға, бигерәк тә тыумыштан йөҙ-яңағында кәмселеге булған балаларға бушлай әмәлиәт үткәрә. Самбо һәм дзюдо буйынса Америка чемпионы, яҙыусы 2005 йылда «Донъя табибы» халыҡ-ара премияһына лайыҡ була. Әйтергә кәрәк, Рәсәйҙә унан башҡа бындай премия алыусы юҡ. Ул Лариса Гузеева һәм башҡа билдәле шәхестәргә операция эшләгән. Пластик хирург Өфөлә консультациялар бирә һәм иртәгә бер-нисә операция яһап оҫталыҡ дәрестәре ойошторасаҡ.
Хәсән Баиев, пластик хирург: Пластик һәм йөҙ-яңаҡ хирургияһында ювелир оҫталығы кәрәк, пациентҡа ихтирам менән ҡарау мөһим тип иҫәпләйем. Шул ваҡытта һөҙөмтә лә яҡшы була. Бындағы табиптарҙың операцияны нисек эшләгәнен дә ҡараясаҡмын, ғөмүмән, был осрашыу тәжрибә мәктәбе лә булып тора».
