Өфөлә водитель таныҡлығы булмаған автобус шоферы тотолған

Кисә, 20 февралдә, Сипайлово микрорайонында Юл хәрәкәте хәүефһеҙлеге дәүләт инспекцияһы хеҙмәткәрҙәре 75-се маршрут буйынса йөрөгән “Пежо” автобусын туҡтатҡан. Был мәлдә салонда биш пассажир булған.

ЮХХДИ хеҙмәткәрҙәренә 29 йәшлек водитель сит кешенең таныҡлығын күрһәткән, етмәһә, уныһы ла ялған булып сыҡҡан. Тикшереү һөҙөмтәһендә ирҙең, 5 йыл элек, иҫерек килеш руль артына ултырғаны өсөн водитель таныҡлығынан ҡолаҡ ҡағыуы асыҡланған.

Дәүләт инспекцияһынан хәбәр итеүҙәренсә, автобус штраф туҡталышына ҡуйыла, әлегә осраҡ буйынса аныҡлау эштәре бара.