Рөстәм Хәмитов Республика Хөкүмәтенең 2017 йылғы эшмәкәрлегенә һығымта яһаны

Башҡортостан Башлығы Рөстәм Хәмитов Дәүләт Йыйылышы – Ҡоролтайҙың 51-се ултырышында сығыш яһаны.

Инеш һүҙендә, Рөстәм Хәмитов 18 мартта үткән Рәсәй Президенты һайлауҙары темаһына туҡталып үтте. Һайлауҙарҙа Владимир Путин еңде, ул беҙҙең республикабыҙ өсөн күп эшләй, төбәк етәкселәрен һәр саҡ хуплап тора. Шул уҡ ваҡытта Президент яңы маҡсаттар ҡуя, уларҙы үтәү байтаҡ көс талап итә, тип билдәләне Республика Башлығы.

– Йәш ғаиләләргә ярҙам итеү тураһындағы бойороҡҡа ҡул ҡуйҙым. Был маҡсатка федераль бюджеттан 530 миллион һум бүленәсәк. Рәсәйҙә ижтимағи өлкәгә сарыф ителгән аҡса күләме буйынса Башҡортостан 8-се урында, Волга буйы федераль округында - 1-се урын. Балалар баҡсаһында яңы урындар булдырыу өсөн республика ике йыл эсендә 1 млрд һум аласаҡ. 2025 йылға тиклем мәктәптәрҙә икенсе сменаны бөтөрөү буйынса һорауҙар хәл ителәсәк, - тип һөйләне Рөстәм Хәмитов.

Берҙәм дәүләт имтиханы һөҙөмтәләре буйынса Башҡортостан 7-се урында. Рәсәйҙең туристик рейтингта 11-се, Волга буйы федераль округта 2-се урынды биләйбеҙ. Былтыр беҙгә 2 млн. турист килгән, улар араһында 100 мең сит ил граждандары.

Сәнәғәт өлкәһе лә үҙгәрә. Салауат ҡалаһында яңы акрил комплексы эш башланы, “Башнефт”тә таҙартыу ҡоролмалары сафҡа инде. Затон йылылыҡ-энергетика үҙәгенең төҙөлөүе тамамланды, тәбиғәт һаҡлауға күп көстәр йүнәлтелде.

Ауыл хужалығы күрһәткестәре буйынса ла республика яҡшы һөҙөмтәләр күрһәтә. Башҡортостан торлаҡ төҙөү буйынса алдынғылар рәтендә. Ҡариҙел районында күпер төҙөлдә, Тимашев үткәргесендә лә актив эштәр бара. Быларҙың барыһы ла республика бюджетына төҙөлә.

Халыҡтың талаптары үҙгәрә, властан да өмөттәр башҡа. Беренсе урында тормош сифаты юғары булырға тейеш. Белем биреү ойошмаларында яҡшы шарттар булдырырға, төҙөкләндереү, шарттар тыуҙырыу эштәрен алып барырға, замана менән бергә атларға кәрәк.

Рөстәм Хәмитов