Эске эштәр министрлығының Иҡтисади хәүефһеҙлек һәм коррупцияға ҡаршы көрәш идаралығы хеҙмәткәрҙәре Краснокама районында өс кешене ҡулға алды. Улар Ағиҙел йылғаһынан 1 200-гә яҡын ҡыҫала тотоуҙа ғәйепләнә.
Браконьерҙар законһыҙ эшмәкәрлек менән былтыр декабрҙән шөғөлләнгән. Алдан ҡыҫалалар күпләп йәшәгән урынды билдәләгән, мәке уйған һәм тыйылған боҙ аҫты ҡорамалдары урынлаштырған. Ә инде эләккән табыштарын Өфө, Ҡазан һәм Мәскәү ҡалаларындағы кибет-ресторандарға оҙатҡан. Ҡулға алыныусыларҙың береһе, урындағы балыҡсылыҡ хужалығының промысла участкаһы етәксеһе булыуы асыҡланған. Осраҡ буйынса енәйәт эше ҡуҙғатылған. Браконьерҙарға биш йылға тиклем иректәренән мәхрүм ителеү янай.
