Силәбе өлкәһендә Башҡортостан артистары сығыш яһаны. "Далан" фольклор-эстрада төркөмө һәм Башҡортостандың халыҡ артисы Ғәзим Ильясов республиканан ситтә йәшәгән милләттәштәренә йырлы-моңло күстәнәстәрен бүләк итте.
Төбәк башҡорттарының рухи донъяһы "Далан" төркөмө артистарына яҡшы таныш. Коллективтың етәксеһе Артур Туҡтағолов үҙә лә сығышы менән Ырымбур өлкәһенән. Көньяҡ Урал тамашасыһы Башҡортостан йондоҙҙарының хитҡа әүерелгән йырҙарын да, яңыларын да яратып тыңланы. Ғәзим Ильясовтың миллләттәштәренә мәрәжәғәте һәр кемдең күңелендә йылы хистәр уятты. Халыҡ артисы тамашасыларын дин, мәғрифәт юлынан тайпылмауҙарын һораны.
Артур Туҡтағоловтың дәртле көйҙәренә силәбеләр ҡушылып йырлап, бейеп тә алды. Тамаша аҙағында сәхнә йондоҙҙары силәбе халҡы менән яҡындан аралашты, бергәләп фото төштө һәм киләсәктә тағы ла сағыу сығыштары менән Көньяҡ Урал халҡын ҡыуандырасаҡтары хаҡында белгертте.
