Ғайса Хөсәйеновҡа 90 йәш. Оло юбилейға арналған кисә бөгөн Башҡортостан Фәндәр академияһының Тарих, тел һәм әҙәбиәт институтында үтте. Рәсәй һәм Башҡортостандың атҡаҙанған фән эшмәкәре, халыҡ яҙыусыһы, академик, Салауат Юлаев исемендәге дәүләт премияһы лауреаты, "Халыҡтар дуҫлығы", Почет ордендары кавалеры. Ғайса Батыргәрәй улының хеҙмәте бик күп юғары исемдәр менән баһаланған. Әммә уның төп байлығы китаптары, тел ғилеме буйынса фәнни хеҙмәттәре, әҙәби әҫәрҙәре.
Билдәле шәхестәр тураһында күп яҡлы талант эйәһе тип әйтергә күнеккәнбеҙ. Ә Ғайса Хөсәйенов хаҡында һүҙ барғанда был баһалама ла аҙ һымаҡ. Әҙәбиәтсе, телсе, яҙыусы, фольклорсы, тәнҡитсе. Ғайса Батыргәрәй улы быуындар бәйләнешен һаҡлаусы, халҡыбыҙҙың әҙәби мираҫтын, милли-мәҙәни ҡомартҡыларын киләһе быуындарға тапшырыусы. Уның башҡорт теле һәм әҙәбиәтен үҫтереүгә индергән өлөшө баһалап бөткөһөҙ.
Ғайса Хөсәйенов йөҙәрләгән ғилми хеҙмәт, тарихи проза өлкәһендәге роман-повестар, парсалар авторы. Әҙәбиәт аҡһаҡалы ғүмер буйы эҙләнеүҙәр юлында була, шул уҡ ваҡытта ул фәнгә килгән йәштәр өсөн дә ваҡыт таба, ғалимдың ҡул аҫтында бер нисә быуын диссертациялар яҡлай. Оло йәрәкле остаз, тынғыһыҙ ғалим. Ғайса Хөсәйенов тормоштоң бар йәмен эштә таба.
Йылдар үтә, заман үҙгәрә. Әммә Ғайса Хөсәйеновтың хеҙмәттәре әһәмитен юғалтмай. Йәштәр бөгөн дә уның китаптары буйынса белем ала, фән серҙәренә төшөнә. Уҡытыусыларҙың уҡытыусыһы тиҙәр ғалим хаҡында.
Аҡһаҡал оло юбилейын да эш өҫтөндә ҡаршылай, әммә бар серҙе лә асырға ашыҡмай. Фәнни хеҙмәт ҡабаланғанды яратмай, төплө, етди ҡараш талап ителә, ти ул.
Ғайса Хөсәйеновтың йәштәргә лә әйтер һүҙе шул, асыштарҙы тырыштар, ныҡышмалдар ғына яһай. Фән тоғролоҡ һәм фиҙаҡәр хеҙмәт талап итә. Был хаҡлыҡты арҙаҡлы ғалим һәм яҙыусы үҙ миҫалында иҫбатлаған.
