Гагарин олимпиадаһында еңгән өсөн өҫтәмә балл

Башҡортостандың юғары уҡыу йорттары олимпиада еңеүселәре һәм призерҙарына уҡырға ингәндә өҫтөнлөк бирәсәк.

Был турала бөгөн Башҡортостан Хөкүмәте Премьер-министры урынбаҫары Фәрхәт Самедов муниципаль берәмектәрҙең мәғариф тармағы хеҙмәткәрҙәрен бүләкләү тантанаһында белдерҙе. Наградалар Гагарин олимпиадаһында әүҙем ҡатнашҡан төбәктәргә тапшырылды. Сарала Рәсәй геройы, летчик-космонавт Сергей Ревин да ҡатнаша. Гагарин кубогына олимпиадала быйыл республиканан 122 мең уҡыусы үҙ белемен һынап ҡараған. Был балалар ҡатнашлығындағы иң күләмле сара тип әйтергә мөмкин. Элек олимпиада башланғыс һәм урта синыф араһында ғына уҙһа быйылдан унда өлкән синыфтар ҙа үҙ көсөн һынап ҡарай ала. Киләсәктә Башҡортостандың юғары уҡыу йорттары ла олимпиада еңеүселәренә өҫтөнлөк бирергә уйлай. Йәғни, Гагарин кубогында еңеүселәргә уҡырға ингәндә өҫтәмә 10, призерҙарға 7 балл ҡуйыла. Мәғариф хеҙмәткәрҙәре әйтеүенсә, был бик шәп стимул. Икенсенән, олимпиада патриотик тәрбиә биреү, техник һөнәрҙәргә ҡыҙыҡһыныу уятыу йәһәтенән дә бик мөһим.

“Беренсенән, олимпиадала ҡатнашҡан бала теге йәки был предмет буйынса белемен тәрәнәйтә, тағы ла нығыраҡ өйрәнә, ҡыҙыҡһына башлай. Икенсенән олимпиада Юрий Гагарин исеме менән бәйле, был уҡыусылар менән патриотик эште алып бара. Беҙ үҙебеҙҙең космонавтика менән хаҡлы рәүештә ғорурланабыҙ”.

Айҙар Солтанғолов, Әлшәй районы хакимиәтенең мәғариф бүлеге етәксеһе

Мәләүездәр өсөн бөгөнгө сара икеләтә әһәмиәтле, иртәгә төбәктә Гагарин паркы асыла. Унда Йыһан киңлеген иңләгән ҡунаҡтар саҡырылған. Космонавтика көнө айҡанлы батырлыҡ дәрестәре лә ойошторола. Уҡыусыларҙың йыһан серҙәре менән ҡыҙыҡһыныуы арта, быйыл олимпиадала ике меңдән ашыу уҡыусы ҡатнашты, ти улар.

“Иртәгә, космонавтика көнөндә, Мәләүездә Гагарин исемендәге парк асыла. Унда ҡунаҡтар ҙа саҡырылған. Мәҫәлән, Рәсәй геройы Владимир Ғәлимов. Пионерҙар йортонда ла ҙур сара үтәсәк. Унда беҙ уҡыусыларыбыҙҙы ҡотлап дипломдар тапшырасаҡбыҙ. Уҡыусыларбыҙ араһында Башҡортостан Башлығы грантына эйә булған ике бала бар, ә 20 уҡыусы райондың стипендияһын ала”.

Алик Сатлыҡов, Мәләүез районының мәғариф идаралығы етәксеһе

Автор: Рәмзиә Кәримова.