Ошо уңайҙан бөгөн Башҡортостан Хөкүмәтендә тантаналы ултырыш үтте.
Әлеге ваҡытта республиканың барлыҡ район комиссиялары ла әүҙем эшмәкәрлек алып бара. Улар тарафынан былтыр 1 меңдән ашыу бәлиғ булмаған бала һәм 1 344 ғаилә социаль хәүеф хәлендә тип танылған. Үҫмерҙәр араһында енәйәтселекте иҫкәртеү, ғаилә эсендәге ҡыйырһытылыуҙан, ауыр тормош хәлендә ҡалған балаларҙы яҡлау йәһәтенән дә бындай комиссияларҙың әһәмиәте ҙур. Тантаналы ултырышта айырыуса уңышлы эшләүсе комиссия ағзаларына Башҡортостан Хөкүмәтенең Маҡтау ҡағыҙҙары һәм Рәхмәт хаттары тапшырылды. Бүләкләнеүселәр араһында Бөрйән районы хакимиәтенең бәлиғ булмағандар эштәре һәм уларҙың хоҡуҡтарын яҡлау буйынса комиссия ағзалары ла бар. Төбәк йыл һайын йәш быуын араһында енәйәтселекте иҫкәртеү йәһәтенән республикала алдынғы урындарҙың береһен биләй.
