Игеҙәк ҡыҙҙарҙың ғүмерҙәрен өҙгән Сергей Васильев шартлы рәүештә ваҡытынан алда иреккә сығарылмаясаҡ. Бөгөн Стәрлетамаҡ ҡала судында хөкөм ителеүсенең дәғүәһе буйынса суд ултырышы үтте.
Иҫегеҙгә төшөрәбеҙ, ир дүрт йыл элек Өфөнөң Сельская Богородская урамында ҙур юл фажиғәһенә сәбәпсе була. Эскән килеш машинаһы менән идара итеп, юлды үтеп барған балаларҙы һәм уларҙың олатаһын бәрҙерә, һөҙөмтәлә игеҙәктәр шунда уҡ һәләк була. Ғәйепле зыян күреүселәргә ярҙам итәһе урынға ваҡиға урынынан ҡаса. Ҡулға алынғандан һуң ул ете йыл ярымға енәйәти язаға тарттырыла. Суд ултырышын хәбәрсебеҙ Гөлназ Хәйбуллина күҙәтте.
Игеҙәк ҡыҙҙарҙың ғүмерен ҡыйған ир Головиндар ғаиләһенә әхлаҡи зыян өсөн өс миллион һум бурыслы. Был суд ҡарары күптән сығарылған булыуға ҡарамаҫтан, Сергей Васильев түләүҙәрҙе яңыраҡ ҡына башлаған. "Күрәһең, шартлы рәүештә ваҡытынан алда иреккә сығырға әҙерләнгән",-ти балаларын юғалтҡан әсә. Стәрлетамаҡта үткән процеста ла ҡатын хөкөм ителеүсенең судҡа биргән дәғүәһенә ҡаршы булыуын белдерҙе. Әйткәндәй, ғәйепле ир процеста үҙ теләге менән ҡатнашманы.
Ҡатын суд процесында үҙен тыныс тоторға тырышты, шулай ҙа йөрәге өҙгөләнеүе һиҙелде. Дүрт йыл элек булған юл фажиғәһен оноторлоҡ түгел.
2013 йылдың 30 ноябрендә туғыҙ йәшлек Дана менән Янаның кәүҙәләре Өфөнөң Сельская Богородская урамында табыла. Ҡыҙҙар олатаһы менән кис саф һауала йөрөргә сығып, машина тәгәрмәстәре аҫтында ҡала. Ҡыҙғанысҡа ҡаршы, светофорға тиклем барып етмәй, юл аша сығыу бәләгә килтерә. Яҡында ер аҫты үткәүеле лә барлыҡҡа бар, әммә ҡараңғыла уның аша үтеү мөмкин булмай, баҫҡыстары емерек хәлдә, яҡтылығы юҡ. Водитель иһә юл-транспорт ваҡиғаһы урынынан ҡасыуҙы хуп күрә, шулай ҙа һуңынан полиция хеҙмәткәрҙәре тарафынан ҡулға алына.
Сергей Васильев әле Стәрлетамаҡ ҡалаһында урынлашҡан 21-се холоҡ төҙәтеү колонияһында. Шартлы рәүештә ваҡытынан алда иреккә сығыу маҡсатында ир унда, хатта, эшкә лә урынлашҡан, тәртибенә бер ниндәй ҙә дәғүә юҡ,-тине суд процесында колония вәкиле. Ҡылыҡһырламаһы яҡшы.
Судья яҡтарҙың сығышын тыңлағандан һуң ғәҙел ҡарар сығарҙы. Сергей Васильев шартлы рәүештә ваҡытынан алда иреккә сығарылмаясаҡ. Хөкөм ителеүесе ир ун көн эсендә Башҡортостандың юғары судына мөрәжәғәт итеп, был ҡарарға ялыу бирә ала. Әммә белгестәр фекеренсә, дәғүәнең яҡлау табыуы икеле.
